Palestinsk bonde: – Dei tok vatnet vårt, lagde svømmebasseng og sender kloakk tilbake
Fagforbundet støttar palestinske bønder med brønn-bygging: – Dei israelske busettarane tok vatnet til bonden og sender kloakk i retur for å øydelegge avlingane, seier agronom Fuad Abu Saif, som nyleg stod på scena i Oslo.
Ein mann med langt kvitt skjerf med svart rutemønster står på ei scene.
Rundt 500 par hender gjev han ein lang og kraftig applaus i det han blir omfavna av avtroppande Fagforbundet-leiar Mette Nord.
Den palestinske agronomen Fuad Abu Saif var nyleg i Oslo for å halde tale som gjest på Fagforbundet sitt landsmøte.
I tillegg var han i politiske møte med norske myndigheiter.
Agronomen har jobba mange i år i det palestinske sivilsamfunnet og i arbeid knytt til matsuverenitet og rettane til bønder.
Samarbeider med Fagforbundet
Fagforbundet har støtta det palestinske småbrukarlaget Union of Agricultural Work Committees (UAWC) med ein årleg sum gjennom samarbeidsavtalen med Norsk Folkehjelp. Støtta og samarbeidet starta i 2009.
Fuad Abu Saif beskriv livet til ein av medlemmane i småbrukarlaget:
– Eg vil fortelje om min ven, Abu Ibrahim. Han dyrkar tomatar, aubergine og bønner mellom anna. Før greidde han å tene pengar på å selje det han dyrka. No har han så vidt nok til å brødfø seg sjølv og familien, seier Abu Saif.
Venen bur nær Betlehem i Wadi Fukin:
– Ein dag kom soldatane. Dei erklærte at jorda hans var militært område. UAWC gjekk retten si veg for å prøve å stoppe at landet hans blei teke, men det gjekk ikkje. Soldatane kom og sette opp gjerder og tok rundt 70 prosent av landet hans, seier Abu Saif.
Busettarar tek vatnet
Landet som blei teke frå bonden, blei gjeve til busettarane i den nybygde byen Beitar Illit, seier Abu Saif vidare:
– Ein viktig del av det AUWC gjer, er å hjelpe med å bygge brønnar, kanalar og vatningssystem. Organisasjonen hjelpte til med å rehabilitere tre vasskjelder i dette området. Eit av problema for bonden og min ven Abo Ibrahim er at busettarane har teke mykje av vatnet til han og dei andre gardbrukarane. På landet dei har teke, brukar dei vatnet mellom anna til å fylle svømmebasseng, seier Abu Saif.
Han held fram:
– Dei sender kloakkvatn tilbake over landet til Abu Ibrahim. Dette vatnet er forureina og kan ikkje brukast til å vatne grønsakene og øydelegg den dyrka marka. I tillegg dumpar dei store mengder søppel, seier Abu Saif.
Han legg til at mange andre palestinske bønder slit med at busettarar tek vatnet. Småbrukarlaget AUWC er aktiv både på Gaza og i Vestbredda.
Ropar varsku for Vestbredda
Den israelske nasjonalforsamlinga diskuterer no om dei skal annektere heile Vestbredda.
Abu Saif fortel at fleire av medlemmane i småbrukarlaget har blitt skadde eller drepne av israelske busettarar som er beskytta av soldatar:
– Målet deira er å jage vekk dei palestinske bøndene og stele landet deira.
Får ikkje bruke traktor
I tillegg til mangel på vatn og land har bonde Abu Ibrahim fleire problem:
– Som bonde får han ikkje lov å bruke traktor eller kunstgjødsel. Israel meiner begge kan brukast til terror. Han og andre bønder brukar ofte esel til å frakte det dei dyrkar. Ibrahim er avhengig av å frakte grønsakene gjennom ein jarnport kontrollert av soldatar. Han kan vere open ein time eller to om dagen, eller han kan vere stengd ei veke, seier Abu Saif.
Terrorstempla
I oktober 2021 blei den Fagforbundet-støtta organisasjonen UAWC terrorstempla av israelske myndigheiter. Til protestar frå både Amnesty, FN, EU og den norske regjeringa.
Ni EU-land, blant andre Frankrike, har halde fram med å støtte organisasjonen fordi dei meiner det ikkje finst bevis for terror-skuldingane.
– Dette er reint politisk frå Israel for å stoppe arbeidet til organisasjonen. Israelske myndigheiter har godkjent arbeidet sidan 1986. Dei veit hundre prosent sikkert at ingen ting som er mot lovene deira, blir gjort. Eg tolkar dette som eit teikn på at organisasjonen gjer gode ting for folket vårt, seier agronom Abu Saif.
Leiarar av organisasjonar som er terrorstempla, risikerer 25 år i fengsel. Økonomi-ansvarlege risikerer 20 år i fengsel. Dette er stadfesta av FN.
Etter det Fagbladet erfarer, risikerer nokon som helst som uttaler seg offentleg på vegner av UAWC eller andre terrorstempla organisasjonar å bli fengsla.
Takkar Fagforbundet
Fuad Abu Saif fekk ein lang applaus då han stod på scena i Oslo kongress-senter i førre veke. Det trefte noko i han:
– Applausen betydde mykje og rørte meg djupt. Klappinga var ikkje til meg som Fuad. Han var til palestinske bønder og det palestinske folket. Ei anerkjenning av at dei støttar palestinske rettar og ein palestinsk identitet. Applausen betyr også at verda ser oss. Det gjev meg mykje energi til å gå tilbake og gjere meir for bøndene, seier Fuad Abu Saif.
Han legg til:
– Samarbeidet og støtta frå Fagforbundet med sine over 400.000 medlemmer i Noreg, gjev oss håp og standhaftigheit. På trass av all motgangen og øydeleggingane vil palestinske gardbrukarar fortsette å dyrke landet sitt. Å dyrke mat er på den eine sida ei handling som viser motstandskraft, men også livskraft, seier Abu Saif.
