Fagforbundet-topp inn i helseutvalg

Korleis få fleire tilsette, kortare køar og unngå at pasientar blir kasteballar? Det skal blant andre dagleg leiar av Fagforbundet, Lars Erik Flatø, finne ut av.

UTVALT: Til vanleg jobbar Lars Erik Flatø som dagleg leiar av Fagforbundet. No skal han også bli ein del av det nye utvalet.
Publisert Sist oppdatert

Regjeringa og helseminister Jan Christian Vestre har vil ha reform av helsevesenet. Nyleg har dei sett ned Helsereformutvalget som skal sjå på korleis alt frå sjukehusa til helsehjelp i kommunane kan bli betre.

Første utval av sitt slag

Til vanleg jobbar Lars Erik Flatø som dagleg leiar av Fagforbundet. No skal han også bli ein del av utvalet som skal kome med forslag og råd til korleis det norske helsevesenet kan bli betre:

– Dette er jo eit viktig og utfordrande arbeid. Organiseringa av norsk helse- og omsorgsteneste har aldri vore gjennomgått på den måten dette utvalet skal gjere. Vi veit at tenestene står overfor store utfordringar, særleg grunna veksten i talet på eldre og mangelen på personell, seier Flatø.

Fakta om Helsereformutvalget

Regjeringa satte i august ned Helsereformutvalet. Utvalet skal:

  • Greie ut og foreslå ulike modellar for framtidig organisering, styring og finansiering av ei samanhengande og integrert helse- og omsorgsteneste i Noreg.

  • Vurdere ansvars- og oppgåvedelinga mellom den kommunale og fylkeskommunale helse- og omsorgstenesta og spesialisthelsetenesta.

  • Vurdere korleis samarbeid med private aktørar kan organiserast på ein føremålstenleg måte, for å sikre at vi framleis skal ha felles og likeverdige skattefinansierte helse- og omsorgstenester i Noreg.

  • Utarbeide eit beslutningsgrunnlag og foreslå tiltak som støttar opp under:

    • høg kvalitet i helse- og omsorgstenestene,

    • likeverdige tenester over heile landet,

    • samanhengande og heilskaplege pasientforløp,

    • effektiv oppgåvedeling og ressursbruk mellom dei ulike delane av tenestene,

    • forsterka innsats for folkehelse og god førebygging,

    • oppfylling av pasient- og brukarrettar,

    • valmoglegheiter, mellom anna fritt sjukehusval,

    • pårørande si rolle,

    • målet om å redusere sosial og geografisk ulikskap,

    • at den offentlege helse- og omsorgstenesta skal vere fagfolka sin føretrekte arbeidsplass,

    • ny teknologi, KI og digitale løysingar, samt sikre rett bruk av menneskelege og teknologiske ressursar,

    • demokratisk styring av helse- og omsorgstenesta,

    • god totalberedskap i heile landet.

  • Gjere greie for økonomiske, juridiske, administrative, personellmessige og samfunnsmessige konsekvensar av dei ulike framlegga.

    Utvalsrapporten skal leggjast fram 1. november i 2026.

(Kjelde: regjeringen.no)

Håpar på varige løysingar med brei støtte 

Helsereformutvalet skal kome med forslaga i november neste år. I eit tidlegare intervju med Fagbladet har helseminister Vestre signalisert at han ønsker eit helseforlik på Stortinget. Flatø seier han håpar at arbeidet til utvalet vil nå breitt ut:

– Eg håpar vi vil kome fram til forbetringar av samspelet mellom kommunehelsetenesta og spesialisthelsetenesta. At vi kan samle brei politisk tilslutning. Og at vi dermed kjem fram til løysingar som står seg over tid.

Desse er med i utvalet

Leiar 

Gunnar Bovim, rådgivar, Trondheim

Medlemmer

 Somayeh Sadat Bach, leiar, Oslo.

Øyvind Bakke, administrerande direktør v/Sjukehuset i Vestfold, busett i Oslo.

 Jonny Finstad, ordførar, Vestvågøy.

 Lars Erik Flatø, dagleg leiar, Gran.

 Edith Lillian Roth Gjevjon, fagsjef, Nesodden.

 Marit Hermansen, sjefslege, Grue.

 Oddvar Martin Kaarbøe, professor, Bergen.

 Kjetil Andreas Hognestad Karlsen, klinikksjef, Trondheim.

 Silje Naustvik, leiar, Hamar. 

Kari Sønderland, pensjonist, Oslo.

 Tone Poulsson Torgersen, fagsjef, Oslo

Erfaring frå regjering, sjukehus og kommune

Flatø har blant anna bakgrunn som statssekretær, generalsekretær i Kirkens Bymisjon og direktør for Lovisenberg diakonale sykehus.

– Korfor trur du at du blei spurd om å delta i utvalet?

– Eg reknar med at det er bakgrunnen min som leiar i helsetenesta. Og at eg no har kjennskap både til spesialisthelsetenesta og kommunehelsetenesta. I tillegg har mine ti år som kommunepolitikar gjeve meg verdifull innsikt i kommunehelsetenesta. Den er verdifull å ta med inn i dette arbeidet.

Vil ha nye løysingar

Flatø var med på å forme helseføretaka på starten av 2000-talet:

– Det eit kvart hundreår sidan no. Eg synest det er artig å få lov å vere med på dette arbeidet no, i og med at ei ny tid krev nye løysingar, seier Flatø.

nyheter

Mest lest | Siste sju dager

Les flere nyheter:

Powered by Labrador CMS