Her kjem Vestre med lovnader på sjukeheimen
– Vi skal løyve pengane og grunnbemanninga skal opp. Det er eit løfte, seier helseminister Jan Christian Vestre.
– Vi blir så godt teke vare på her, men det kan vere slitsamt for dei som jobbar, seier ei dame med grått hår sittande i ein godstol. Den ustrakte fura handa hennar har akkurat møtt ei yngre hand. Ein mann med dress og brunt skjegg lener seg litt inn og ned mot ho. Auga hans føl blikket hennar og han svarar:
– Og akkurat det at det kan vere slitsamt for dei tilsette har vi tenkt å gjere noko med, svarar han.
Løfte
Helseminister Jan Christian Vestre er på omvising på Åskollen bo- og servicesenter i Drammen. Med seg har han eit løfte. Får han og Ap fortsette i regjering etter valet, skal dei som jobbar her og kollegaene i heile landet merke ein forskjell:
– Dette er eit løfte, ja med utropsteikn! Vi har lytta til Fagforbundets medlemmer, som er veldig tydelege på at bemanning er den største utfordringa no. Og det tek vi på stort alvor. Vi skal levere eit løft på auka grunnbemanning og fleire på jobb, seier Vestre.
Ni av ti meiner det er for få folk på jobb
Helseministeren viser til Fagforbundet si medlemsundersøking. Der kjem det fram at i Buskerud meiner 48 prosent av medlemmane at det ikkje er nok folk på jobb til å gjere arbeidet på ein forsvarleg måte. Sju av ti meiner det ofte er travelt og stressande på jobb. Nasjonalt viser tala at åtte av ti meiner bemanninga må bli betre i barnehage og SFO. Ni av ti som jobbar i eldreomsorg og helse meiner det er for få på jobb.
Vil gje meir til kommunane
Vestre har nyleg strakt ut ei hand til alle partia på Stortinget. Han ønsker å få til eit helseforlik. Innan det eventuelt kjem på plass vil han auke grunnbemanninga slik:
– Vi må rekruttere fleire. Vi må behalde dei vi har. Vi må satse på heiltid, vi må satse på ordentlege arbeidstidsordningar. Vi må få ned belastninga, slik at vi òg får sjukefråværet ned, og at det er lettare å stå lenger i arbeid. Vi må sjå på om vi kan gjere det enklare for fleire å stå lenger i yrket. Og så må vi prioritere ein ordentleg kommuneøkonomi, som gjer det mogleg å tilsette og løne folk, og ha tilstrekkeleg folk på jobb, rett og slett, seier Ap-ministeren. Han vil ikkje talfeste konkret kor mykje meir pengar eller fleire tilsette han skal sørge for til helse. Vestre seier at han også ønsker å tilrettelegge turnusane og arbeidstida til dei ulike livsfasane og behova som folk har.
Tilbyr alle under 30 utanfor arbeidslivet jobb i helse
Vestre viser til at han og regjeringa vil gje alle under 30 år som står utanfor, jobb i eldreomsorg og barnehage. Det skal dei få via arbeidstrening og kvalifiseringsprogram. Dette er eit av tiltaka for å sikre fleire på jobb i helse. Fagforbundet-leiar Mette Nord trur dette kan vere eit av fleire tiltak som kan hjelpe mot mangelen på tilsette:
– Dette er eg heilt sikker på vil hjelpe og vil bli ein veg inn for mange. Der mange kan få ei helsefagarbeidarutdanning medan dei jobbar. Det vil gjere at ein ser verdien av jobben, opplever meistring og får eit sosialt felleskskap. Dette kan bidra til å få fleire unge i arbeid og være en viktig rekrutteringsvei inn til helsefagene, seier Nord.
Over ein halv million utanfor arbeidslivet
Helene Skeibrok er nestleiar i Fagforbundet. Ho viser til at det er over 600.000 i arbeidsfør alder som står utanfor. Ho støttar plana om å tilby unge som ikkje arbeider jobb i helse og barnehage:
– Samfunnet treng desse folka. Men ikkje minst er det viktig for den enkelte å kunne bidra i det sosiale fellesskapet. Så det er ein vinn-vinn-situasjon. Både for den enkelte, men også for samfunnet elles, og ikkje minst for våre medlemer som allereie opplever at dei har for dårleg bemanning, for lite kollegaer rundt seg. Det håpar eg kan vere med og sørgje for at folka våre òg kan klare å stå i yrket fram til dei går av med pensjon, seier Skeibrok.
