Anbud
Anbodsplanane krasjlanda: Kostar kommunen åtte millionar kroner
Plana var at privatiseringa skulle gje ein betre sjukeheim og at kommunen skulle spare 3,6 millionar kroner i året. Det enda med at fleire slutta, sjukmeldingar og ei rekning på rundt åtte millionar kroner.
Det politiske fleirtalet i Ålesund kommune ville legge ut Hatlane omsorgssenter på anbod. Prøveprosjektet til Høgre, Frp og Ålesundlista var å sjå om private kunne drive betre og rimelegare for den økonomisk pressa kommunen. I vinter blei konkurranseutsettinga stoppa etter at tilsette slutta, vikarutgiftene auka og berre eit selskap la inn anbod. SV ba administrasjonen finne ut kor mykje anbodsrunda har kosta kommunen. Nyleg kom anslaget frå administrasjonen: Åtte millionar kroner.
Varaordførar: – Viktig å skaffe kunnskap
Jessica Gärtner (H) er varaordførar i Ålesund kommune. Ho meiner det var rett å gjere anbodsforsøket.
– Kva tenkjer du om meirkostnaden på 8 millionar kroner?
– Det er rett at det har vore kostnadar knytt til sjølve prosessen. Samtidig meiner eg det var viktig å undersøkje kva moglegheiter som finst i marknaden, skriv Gärtner i eit e-post svar og fortset:
– Som lokalpolitikarar har vi eit ansvar for å vurdere ulike løysingar. Og ikkje på førehand utelukke alternativ. Å skaffe seg kunnskap om marknad kostnadsnivå og ulike driftsformer har i seg sjølv ein verdi, trass i at prosessen ikkje førte fram til ei konkret løysing denne gongen.
Tilsette slutta
Kommunaldirektøren estimerte at om eit privat selskap tok over drifta av Hatlane omsorgssenter, ville det bli 3,6 millionar kroner billigeare i året. Slik gjekk det ikkje.
Gjennomgangen frå administrasjonen tek for seg kva som førte til meirkostnadar ved anbodsprosessen. I analysen som blei lagt fram for formannskapet, blir det blant anna peika på at seks helsefagarbeidarar og ein sjukepleiar slutta då dei fekk vite at omsorgssenteret skulle bli privat. Det var få nye som ville jobbe på omsorgssenteret, auka sjukmelding og meir bruk av vikarbyrå.
Samtidig slit kommunen tungt med økonomien og har vore i faresona for å hamne på ROBEK-lista og bli sett under statleg administrasjon. Les meir om kva som blei dyrare grunna anbodet i faktaboksen under.
– Har lært mykje
Ein pårørande som har kona på Hatlane omsorgssenter, kallar anbodsrunda eit «gedigent mageplask» . Varaordførar Gärtner seier det politiske fleirtalet har fått ny kunnskap.
– Kva er lærdomen frå prosessen?
– Det er viktig at organisasjonar lærer av dei prosessane dei går gjennom og i dette tilfellet meiner eg at Ålesund kommune har lært mykje. Prosessen har gitt verdifull erfaring med korleis slike prosessar fungerer og kva som blir kravd av førebuande arbeid. Denne lærdommen vil vere nyttig i framtidige vurderingar og avgjerder.
Meir anbod?
Høgre, Frp og Ålesundlista har diskutert at det kan bli aktuelt å legge ut heimetenesta på anbod.
– Kva tenkjer du om eventuelle framtidige prosessar med anbod?
– På eit overordna nivå meiner eg det er viktig å vere open for å undersøkje kva for løysingar som finst. Det kan vere kommunale løysingar, ideelle aktørar eller private. Eg meiner lokalpolitikarar må tore å sjå på ulike alternativ og skaffe seg kunnskap, framfor å låse seg til éi løysing av prinsipp. Målet må alltid vere å sikre best moglege tenester for innbyggjarane, innanfor trygge og ansvarlege rammer.
Tillitsvald: – Kastar pengar ut vindauget for ideologi
Laila Irene Alvestad er hovudtillitsvald for Fagforbundet i Ålesund kommune. Ho meiner Frp, Høgre og Ålesundlista har blitt blenda av ideologi:
– Kommunen har slite økonomisk. Det opplevast som om dei kastar pengar ut gjennom vindauga for å følgje eigen ideologi. Dei ville få inn andre aktørar som kunne vise at tenestene kunne drivast på ein annan måte, seier tillitsvalde Alvestad.
– Har blitt åtvara
Alvestad seier Fagforbundet og fleire andre åtvara mot å legge Hatlane omsorgssenter på anbod:
– Det verste er at dei har fått varsel på varsel om at dette kom til å bli dyrt. Likevel valde dei å gå vidare med det. No viser det seg, ikkje overraskande, at dette blei dyrt, seier den hovudtillitsvalde. Ho håper no at fleire vil ønske å jobbe ved senteret igjen:
– Hatlane er eit svært godt drive omsorgssenter som har hatt eit veldig bra arbeidsmiljø. No håpar eg verkeleg at folk søkjer. Dei har mista mykje kompetanse som det er viktig å få tilbake. Det er òg viktig å få ned utgiftene til vikarbyrå, seier Fagforbundet-tillitsvalde Alvestad.
