Åleinemor fryktar privatisering vil ramme familielivet hardt

Jobben til reinhaldar og åleinemor Karen kan bli privatisert: – Då må eg ha ein eller to ekstrajobbar for å overleve.

UTRYGG: Karen Alegre har i dag fleksibel kjernetid på jobben som gjer at ho kan gå på møte på skulen for sonen og kan lett vere der for han når han blir sjuk. Fagforbundet-medlemen fryktar både dårlegare løn, pensjon og mindre tid med sonen om jobben til ho og kollegaene blir sett ut på anbod.
Publisert Sist oppdatert

Fem kvitkledde sit inne på eit tomt reinvaska legevakt-rom. Ein av dei, Karen Alegre tek ordet:

– Om eg blir flytta over frå kommunen til eit privat selskap, vil det bety mykje for livet mitt, seier åleinemora og Fagforbundet-plasstillitsvalde Karen Alegre og fortset:

– Då må eg ha to, kanskje tre jobbar for å betale rekninga. I dag har eg fleksible ordningar på jobben som gjer at eg kan gå på møte på skulen om sonen min eller hente han når han blir sjuk. No har eg fleksibilitet og tryggleik i ein fysisk krevjande jobb, seier Fagforbundet-medlemen. 

Alegre har i dag ein jobb med kjernetid og fleksitid. Som gjer legg til rette for at ho kan gå på møte på skulen blant anna. Ho fryktar at om ho må over i eit privat selskap må ho ta ulønna fri der ho i dag kan bruke fleksitid. Og at både løna, pensjonen og forsikringane blir dårlegare. 

UVISSE: Dei fem Fagforbundet-medlemmane seier dei føler seg utrygge på korleis liva deira vil bli både på jobb og heime. Om jobbane deira blir privatiserte. Frå venstre Karen Alegre, Genalita Rosantina Gant, Samuel Berhane, Rose Måke og Mary Gloria Basil.

Fakta om spareforslaget

  •  Byrådet i Oslo har sett ned Effektiviseringsprogrammet.
  • Formålet er å sjå på korleis kommunen kan spare pengar og drive meir effektivt.
  • Effektiviseringsprogrammet kom med rapportar 14. januar. 
  • Rapportane tek for seg sparing og effektivisering i desse sektorane i Oslo kommune.
  • Byutvikling, kultur og næring, miljø og samferdsel, utdanning, sosiale tenester, helse, finans og byrådsleiaren sitt kontor.
  • Ein del av forslaga går ut på å blant anna sette ut på anbod reinhald, vakt og drift.
  • Byrådet skal bestemme om dei går for forslaga i løpet av våren.
  • Privatisering av tenester er estimert å spare rundt ti prosent av utgifter til drift i året. 

Kan miste over ein million i pensjon kvar

Åleinemora Alegre seier ho fryktar å miste alt dette om jobben på legevakta i Oslo blir sett ut på anbod. Ho er ikkje åleine om å ha bekymringar. Ved sidan av ho sit kollega Samuel Berhane og Mary Gloria Basil:

– Eg har jobba som reinhaldar på legevakta i 34 år, seier Basil. Ho og Berhane har eit problem om dei må over i eit privat selskap: Dei risikerer å miste AFP-pensjonen sin fordi dei er over 55 år og ikkje rekk å spare seg opp ny.

Då vil dei tape rundt ein million i pensjon kvar, og begge må jobbe fem år lenger. I ein jobb der dei ofte gjer den same bevegelsen fleire hundre gonger om dagen. På golvet. På veggane. I taket:

– Eg har arbeidd mange år for Oslo kommune. Dette vil eg ikkje, seier Berhane.

34 ÅR: Mary Gloria Basil har jobba som reinhaldar i 34 år ved legevakta i Oslo. I dag brukar ho blant anna ein pad som effektivt viser kor ho kollegane har vaska og kor ho skal vaske.

Vil spare pengar på reinhaldarane

Oslo kommune er styrt av Høgre og Venstre med støtte av Frp. Byregjeringa har starta Effektiviseringsprogrammet. I januar kom Effektiviseringsprogrammet med forslag om å sette ut rundt 30 stillingar innan vakt, drift og reinhald på anbod. Tanken er at dette skal spare rundt ti prosent av utgifter på drift i året:

– Dei tenker ikkje på situasjonen til vanlege folk. Dei må slutte å eksperimentere, tenke på framtida vår og behandle oss likt som andre tilsette i kommunen. Eg inviterer politikarar som vil privatisere til å møte oss og bli med oss ein dag på jobben. Der vil dei sjå at utan oss er det ikkje noko sjukehus, seier Rose Måke. 

– JOBBAR LOJALT: Genalita Rosantina Gant seier ho og kollegaene står på, jobbar hardt og lojalt. Og at dei stod spesielt på, døgnet rundt, under covid-pandemien. Og framleis har ei viktig og avgjerande rolle å stoppe smitte frå å spre seg ved legevakta.

Måtte kjempe seg til faste jobbar

 Reinhaldarane ved legevakta har måtta kjempe lenge og hardt for å kome dit dei er i dag. Tre av dei fem som Fagbladet intervjuar, måtte jobbe midlertidig i fleire år. Etter at Fagforbundet og tillitsvalde Stig Berntsen tok saka deira fekk dei etter kvart 50 prosent fast stilling. Seinare 65 prosent fast jobb. Men så fekk reinhaldarane tilbod om det som blei omtala som den minste faste stillingane i Noreg. Dei fekk kontraktar på 0,33, 0,51 og 0,53 prosent faste stillingar. Oslo kommune kalla desse kontraktane eit arbeidsuhell og gav reinhaldarane tils lutt heile faste jobbar:

– Vi gjer jobben med heile hjartet og jobbar lojalt. Og vi er trygge slik vi har det i dag, seier Genalita Rosantina. Om forslaget til Effektiviseringsprogrammet får ja, blir jobbane til reinhaldarane ved legevakta sett ut på anbod og privatiserte i løpet av i år. 

GLADE I JOBBEN: Mary Gloria Basil fortel at ho og kollegane er glade i den trygge jobben dei har i Oslo kommune. Og at dei har eit arbeidsmiljø som gjev stor glede.
renhold renholder oslo kommune nyheter legevakt konkurranseutsetting fagforbundet anbud privatisering

Les flere nyheter:

Powered by Labrador CMS