Nytt sjukehus

Sekretærane kviskra i det opne kontorlandskapet på det nye sjukehuset. Då sa øyre-nese-hals-legen stopp

Det nye opne kontorlandskapet gjer at tilsette kviskrar og er mindre sosiale: – Legen kom inn og fortalte at kviskring er skadeleg for stemmebandet, seier tillitsvalde Christine Myrvang. 

KVISKRING: – Legen sa då at kviskring har dårleg effekt på stemmebandet ditt når du kviskrar mykje, sier Christine Myrvang.
Publisert

I haust klippa kronprinsen snora og helseministeren sa det nye sjukehuset er i europeisk toppklasse. Samtidig meiner fleire tilsette ved Drammen sykehus at noko må bli betre. 

Christine Myrvang er hovudtillitsvald for Fagforbundet ved sjukehuset. 

Ho fortel om ein øyre-nase-hals-lege som reagerte på at mange kviskra til kvarandre i det opne landskapet:

– Legen sa då at kviskring har dårleg effekt på stemmebandet ditt når du kviskrar mykje. Det kan gje skadar på stemmebandet ved å kviskre mykje over lang tid. Den seksjonen har fått beskjed om at dei må slutte med det og snakke med vanleg stemme, seier Myrvang. 

Fagbladet har snakka med legen, som stadfestar at rådet vart gjeve, men ikkje vil gå inn ein offentleg debatt om kontorutforming.

At kviskring ikkje er bra for stemmen, kjem også fram i denne amerikanske medisinske studia.

KONTOR: Fakhra Mustafa er medlem i Fagforbundet og jobbar i ope kontorlandskap på Drammen sykehus.

Tilsette blir sjuke

Sidra Choudhry jobbar i det opne landskapet som helsesekretær. 

Ho seier det opne landskapet gjer at fleire blir sjuke grunna bakgrunnsstøy:

– Landskapet er utfordrande. Vi er så mange som sit med telefonar og støy rundt oss. Det blir forstyrringar av legar og sjukepleiarar som skal inn og spørje oss om noko eksempelvis. På det gamle sjukehuset hadde vi eigne kontor der to eller tre sat og jobba stille og roleg. No slit fleire med veldig mykje hovudpine. Det er sjukdom grunna mykje støy, dårleg og tung luft, seier Sidra Choudhry.

Overlege: – La dei tilsette bestemme!

Fagbladet har intervjua to overleger om kviskring og utforming av kontorlandskap.

Håkon Pharo Skaug er overlege og spesialist innan øyre-nase-hals ved Drammen sjukehus. Han er kjent med situasjonen og at dei tilsette kviskrar i dei opne kontorlandskapa:

– Når ein kviskrar, så brukar ein ekstra muskulatur i strupehovudet. Dette aukar trykket nede frå lungene når ein slepp lufta gjennom strupehovudet. Det skapar irritasjon på stemmebanda når det skjer over tid.

– Er det sånn å forstå at det ikkje er heilt bra for stemmebandet å kviskre over lang tid?

– Ja, det gjev ei belasting på stemmebandet som gir auka plage for muskulære spenningar. Ein kan få hesheitsplager og utvikle slimhinnehevingar som kan gje plager med stemmen over lengre tid, seier Skaug til Fagbladet.

– La dei tilsette bestemme over kontora

Trygve Aune har jobba i over 40 år som lege med spesialisering innan øyre-nase-hals. Den pensjonerte overlegen har erfaring frå Ullevål sykehus og som avdelingsleiar ved Molde sjukehus. Han seier at kviskring ikkje er bra for folk som brukar stemmen mykje, som er sjuke eller har ein eller annan slitasje på stemmebanda. Han meiner kontorløysinga ved Drammen sjukehus er ei dårleg ide:

– Denne løysinga er jo heilt forferdeleg. Kan ikkje vi legar, sjukepleiarar, fysioterapeutar og helsesekretærar og dei som driv sjukehus og veit korleis det fungerer, få bestemme? Slik at vi får gjort jobben vår best? spør Aune.

Overlege løftar fram helsesekretærane

Som leiar seier Aune at han ofte løfta fram rolla til helsesekretærane:

– Som avdelingslege sa eg alltid at sekretærane er svært viktige. Det er dei som held orden på legane. Hugs at pasientar som ringer, er engstelege og fortvilte. Dei ringer for seg sjølve, eller for gamlemor, far eller ungane sine. Då må det vere eit menneske som seier: Ja, eg høyrer deg, og vi har god tid og som snakkar roleg og tydeleg for å vite korleis ting ligg an. Då kan du ikkje sitje i eit kontorlandskap der andre høyrer dette. Det seier seg sjølve, seier han og legg til:

– Viss eg skulle bruke hovudet mitt som lege, så må eg ha det stille i jobben. Det må dei fleste legar. Og korleis trur du helsesekretærane har det når dei kjem heim til familien sin og opplever at dei har blitt hysja på når dei prøvar å gjere jobben sin?

Aune støttar helsesekretærane i at dei må kunne sitje skjerma.

 

 

FORANDRING: Sidra Choudhry sat før i eit avlukka kontor saman med to eller tre andre helsesekretærar ved gamle Drammen sykehus. Fagforbundet-medlemmen håpar at leiinga ser på andre løysingar enn dei opne landskapet dei brukar i dag.

Vil ha skjerming og støydemping

Både ho og kollega Fakhra Mustafa er helsesekretærar og medlemmar i Fagforbundet:

– Det er så mange som kjem inn og mykje forstyrring og bråk. Det er mange som går forbi heile tida. Du klarer ikkje så enkelt å jobbe og fokusere deg, seier Mustafa. 

Sjukehuset er flunkande nytt. Samtidig etterlyser begge helsesekretærane skjerminga dei hadde på det gamle.

– På det gamle sjukehuset hadde vi kontor der tre eller fire kunne sitje saman å jobbe stille og roleg. No er det bråk og mange menneske rundt heile tida. Vi treng meir inndeling der to eller tre kunne sitje saman å jobbe, seier Choudhry.

TILLITSVALD: Fakhra Mustafa diskuterar situasjonen for helsesekretærane saman med hovudtilltsvalde Christine Myrvang og Sidra Choudhry inne ved ei av kontor-øyene på Drammen sykehus.

Mange yrkesgrupper sit saman 

Hovudtillitsvalde Myrvang likar at helsesekretærar sit saman med andre yrkesgrupper:

– Her sit legar, sjukepleiarar og helsesekretærar saman, seier Christina Myrvang og peikar ut over ei øy med opne kontorlandskap. 

Ho er hovudtillitsvald for Fagforbundet ved Drammen sykehus. 

Myrvang likar tanken godt: Dei ulike yrkesgruppene skal sitje nær kvarandre, bli godt kjent og raskt skal kunne løyse oppgåver i lag. 

Mindre sosiale i ope landskap

Ho seier måten kontora er løyst på verkar mot si eiga hensikt. At dei tilsette er mindre sosiale og snakkar mindre saman. 

Ei stor norsk studie viser at opne kontorlandskap fører til at folk snakkar mindre saman. 

Og det har vore ein del hysjing på kontoret i Drammen, ifølgje Myrvang.

– I praksis fungerer kontorløysinga suboptimalt fordi ein er redd for å forstyrre kollegaene eller ei anna yrkesgruppe. Ein dempar seg, kviskrar eller kanskje vel å ikkje spørje. Du spør berre når det verkeleg er viktig. Og det går utover det sosiale. Du får ikkje det gode arbeidsmiljøet der nokon snur seg og spør korleis helga var, seier ho.

Etterlyser støydemping

Ho meiner det må skje noko med støyen:

– Optimalt skulle eg ønske at det var laga litt meir soner og støydemping. Spesielt for dei kontortilsette som sit der frå åtte til fire kvar dag. At dei får meir soner der dei kan vere, så dei slepp å ta omsyn til ei legegruppe eller ei anna gruppe. At det blir laga seksjonar der dei kan prate. Samtidig at det er såpass ope at legane torer å kome hit. Det er viktig med ein kultur for openheit kombinert med demping, seier Myrvang.

Ho seier og det er for få møterom til dei kontortilsette. 

NYTT: Dei heilt nye kontora ved Drammen sykehus er laga i form av øyer og tanken er at det skal vere kort veg mellom yrkesgrupper som sit saman.

Skal evaluere landskapet 

Gro Vik Knutsen er fagsjef medisin ved Drammen sykehus. 

På e-post svarar ho at dei skal gå igjennom erfaringane med ope kontorlandskap:

«Både tilsette og leiinga ved Drammen sjukehus ser at det er behov for å justere dei opphavlege planane, slik at ein i større grad kan ta omsyn til individuelle behov.»

«Etter innflyttinga 5. oktober har vi fått erfaringar med korleis kontorløysinga vert opplevd av dei tilsette. For kontortilsette som sit mykje i telefonen, og som òg handterer konfidensielle samtalar, ser vi at det kan vere særleg krevjande å sitje i landskap.» 

«Nokre av dei tilsette er tilbydde å sitje i cellekontor når dei har arbeidsoppgåver som tilseier dette. Bruk av støydempande hovudtelefonar/ordinære hovudtelefonar kan òg bidra noko til betre tilhøve. Det er planlagt ei evaluering av bruken av kontorlandskapet med tanke på å gjere justeringar. Den økonomiske situasjonen og 'frys' i bygningsmessige tilhøve gjer det likevel ikkje mogleg å gjennomføre store ombygginga.»

kontoransatt seksjon kontor og administrasjon nyheter kontorlandskap sykemelding støy drammen sykehus

Mest lest | Siste sju dager

Les flere nyheter:

Powered by Labrador CMS